حـــــــــــــــــــــــــــــــــالة

هو ليه ساعات الناس بيعاقبونا علشان بنحبهم !!!!!!!!!!!!!!!!!!؟؟؟؟؟؟؟؟؟؟؟؟؟؟؟؟؟؟؟؟؟؟؟

سواق تاكسي من العصر البائد

النهاردة ركبت تاكسي وانا رايح الشغل علشان كنت نازل متأخر (وماحدش يفتكر اني والعياذ بالله باركب تاكسي كل يوم )

المهم
وطبعا سواقين تاكسي القاهرة مابيصدقوا حد يركب معاهم ويبتدوا في الحواديت اياها بتاعة الحالة والقرف والبلد والزباين والحر
بس المرة دي كان حوار مختلف
الراجل سواق التاكسي كان مواليد 1930
وانا لقيته راجل عجوز فنكشته بسؤال عادي جدا
السؤال كان

انت عشت في عصر الملك فاروق ياحاج؟؟؟؟؟؟؟؟؟؟؟

هاسيبكم انتوا تسمعوا الاجابة بنفسكم وتعلقوا علشان انا ماعنديش اي تعليق علي اللي سمعته
بس بجد بجد حاجة تفرح والله
بجد ماكنتش عايز انزل من مع الراجل

لما هم دول سواقين التاكسي بتوع زمان امال البشوات كانوا شكلهم ازاي

مش ده العصر البائد اللي قالبين دماغنا بيه
شوفوا الراجل حتي وهو بيفكر يشتم بيشتم ازاي
مش هاتكلم كتير وهاسيبكم معاه تسمعوا بنفسكم
ــــــــــــــــــــــــــــــــــــــ
ملاحيظ نفسي اقولها
ـــــــــــــــــــــــــــــــــ

الملحوثة رقم واحد
(حاولت بقدر الامكان صوتي مايبانش علشان صوتي وحش ههههههههههه وبعدين اصلا هو ماكانش محتاج اني اتكلم هو ماصدق واتفتح لوحده )

الملحوثة رقم اتنين

انا مش مؤيد لكلامه في المطلق ولا بارفضه في المطلق انا بس حبيت انشر وجهة نظر الراجل (انا باقول اهو احسن اروح بلالالالالاش ياجدعاااااااان )

لمليء الفراغ

الواد جيمي الله يجازيه كل خير بقي من فترة طويلة كدة كان رمالي تاج وبصراحة لاني مابحبش اتكلم عن نفسيتي او بمعني اصح مابعرفش اصلا اتكلم عنها (اصلها صعبة قوي ومابتحبش حد يجيب سيرتها ) فقررت اقلب التاج بتاع الواد جيمي
بس بما اني بقالي فترة طويلة مش لاقي حاجة اكتبها (او بمعني اوضح شوية زهقان وقرفان ده غير اني عند دور انفلوزة شديد قوي ومش مستطعم اي حاجة ) فقلت اتسلي كدة في التاج ده واهي حاجة تسد وقت الفراغ التدويني

نيجي بقي للمهم

ان ان ان ااااااااااااااااااااااان

س1 : بدأت التدوين امتي؟ودخلت عالم التدوين ازاي؟

ج 1 : ابتديت تدوين في يوم نادي ان شاء الله مش فاكر كان امتي بالظبط بس هو كان السنة دي وبصراحة لقيتها موضة وكل واحد عامله مدونة فقلت اشمعني انا يعني هاعمل مدونة واسيبها زي ما عملت حاجات كتيرة قوي قبل كدة ومكنت باقف في نص المشوار وما اكملش

س2 : إيه كان إنطباعك في البداية؟

ج2: عادي زي انطباعات اكس بالظبط (الانطباعات الاولي تدوم)
زي ماقلت قبل كدة انا عملت مشاريع كتيرة قوي وكنت بابقي معجب بالفكرة واجي ساعة التنفيذ اشتغل وابقي متحمس قوي وبعدين اقف من غير سبب
الاختلاف الوحيد هنا اني يوم ماعملت المدونة صاحبي الدكتور (اكيد فاكرينه) كان قاعد معايا اون لاين واديته لينك المدونة بعد ماكتبت فيها اول 3 بوستات (وكانوا ورا بعض وفي نفس الوقت ) وصاحبنا ده لقيته عمال يقولي كلام غريب قوي
من بتاع استمر واسلوبك مميز ومختلف (قصده متخلف) وكلام كبير قوي من ده
ما اضحكش عليكم انا صدقته ساعتها واتغريت بقي (بقيت مغرور يعني للي مابيفهمش عربي) وفضلت اكتب كل اللي يخطر علي بالي واديني اهه زي ما انتوا شايفين ...............(اللي مش شايف يلبس نظارة ده مش ذنبي انا)

س3 : مين أكثر واحد بتحب تعليقه علي بوستك الجديد؟

ج 3: كل الناس واي حد يكلف نفسه ويعبرني وياخد شوية من وقته ويعلق حتي لو شتمني (ما انا برضو هاشتمه يعني مش هاقوله شكرا)
بس مايمنعش ان فيه ناس معينة بفرح قوي لما الاقي تعليقاتهم زي (انا ودماغي - حبيبة - زمردة - حزينة - جيمي - بيرم المصري - )

س4 : ايه أهم حاجة اتعلمتها من عالم التدوين؟

ج4 : ياااااااه اتعلمت حاجات كتيرة قوي منها علي سبيل المثال
1 الرغي (ابقي رغاي يعني والرغي من الرغيان ويرغي فهو رغاي اي بقه مابيوجعوش من كتر الكلام)
2 الكلام الكتير
3 اتعلمت حاجة مهمة قوي وهي ازاي تقدر تقرف اللي حواليك في عيشتهم وتنكد عليهم (بطريقة مضحكة )السم في العسل يعني

س5 : حاسس إن التدوين له تأثير؟

ج5: طبعا ليه تأثير كبير قوي (ماحدش رزل يقولي تأثير علي ايه بلاش احرااااااااج)

س6 : اذكر 5 أحلام علي الأقل تخص ماضيك وتحلم فيها بتغيير أشياء ما ماذا ستعدل؟ وماذا ستترك؟

ج6 : ولو اني مش فاهم السؤال انما هاحاول اجاوب
1- كان نفسي اطلع حرامي (هم اللي ماسكين البلد اليومين دول - اللي هي كفر ابو عبده يعني ماحدش يفهم غلط- )
2- حاجة مش مهم حد يعرفها (حاجة خاصة بقي الله)
3- ......................... (انا كتبت بس الرقابة شالتها)
4- مش فاكرها
5- مكسل افتكرها

لو عايزين 6 ولا 10 انا مستعد (مافيش اسهل ولا اكتر من الحاجات اللي كان نفسي اعملها )

س7: اذكر 5 أحلام تخص مستقبلك؟

ج7 : ياجماعة احلام تخص مستقبلي طيب انا مالي وماله نخوض ليه في سيرة الناس
علي العموم هاحاول افتكر
1- اشوف شغلانة تانية غير الهندسة (وطبعا مااكونش دكتور ولا صحفي ولا محامي ومحاسب ولا ....... حد يكمل بقي علشان زهقت)
2- عايز اتجوز بقي زهقت من حياة العزوبية
3- نفسي شعري مايطولش علشان باتخنق من مشوار الحلاق (بس ما ابقاش اقرع يعني)
4- اجيب عربية ان شالله زقزوقة علشان ترحمني من شحططة الاتوبيسات
5- اخف من البرد اللي عندي ده علشان زهقت منه (البرد ده غبي قوي عامل زي العيل الرزل الغلس )

س8 :أذكر شخصين علي الأقل متواجدين في حياتك حاليا كنت تود وجودهم قبل الأن بزمن؟

ج8: ناس كتير قوي بس ممكن اغير السؤال واخليه شخصين موجودين دلوقتي وكنت اتمني مايكونوش موجودين
هم الموبيل (علشان بيصحيني من احلاها نومة ) والكمبيوتر (علشان خلاني اقابل اصحابي كلهم علي النت ومش باشوفهم لايف زي زمان)

س9: ده سؤال انا ماليش نفس اجاوب عليه بقي (الله انا حر مدونتي وانا حر فيها)

س10 : تدبس مين في السلطانية دي

ج10 : اي حد فاضي وعنده الجرأة يتكلم عن نفسه واخص بالذكر (حلوة اخص بالذكر دي)

مخنوق جدا و memo و كوشيا و انا ودماغي و عايزة تطلق و Che_WildWing و بنت الشمس و سوووو و بنت عادية جدا و كلمات الصمت و قطة الصحراء و زوايا السحاب و وزة و عجبي

حرايق يامصر

بعد مسلسل الحرائق المتتالية في بلدنا الحبيب والتي انتهت بحريق مصانع المحلة الكبري قرر السيد المسؤول الكبير قوي قوي قوي في البلد تخصيص وزارة جديدة تسمي وزارة حرايق مصر
وفي اول هدية للسيد الوزير الجديد قرر سيادته حرق دم كل المصريين بتخفيضات ممتازة تصل الي 240 فولت لكل مواطن
وربنا يخليه للغلابة الماس الكهربائي اللي حارق دمنا ببلاش كده

وتتوالي الخصومات

طبعا فاكرين الخصم الاخراني بتاع قانون المرور الجديد واكيد فاكرين اني ساعتها قلتلكم اكيد مش هاتأخر عليكم في الخصم الجديد وقد كان
ما عداش اسبوعين وجيتلكم بخصم جديد
بس المرة دي مش بسبب اي قوانين موضوعة (يعني لا قانون مرور ولا قانون ايجار ولا اي قوانين من دي)
المرة دي كان بسبب قانون الطبيعة (قوانين الطبيعة اللي هي زي قانون الجاذبية كدة وخدوا بالكم فيه فرق بين قانون الجاذبية بتاع اكس ولوكس وقانون الجاذبية بتاع عمنا نيوتن)
برضو مش ده موضوعنا ولا دي قوانينا اللي انا قصدي عليها
القانون المرة دي كان قانون مختلف تماما
بص ياسيدي انا هاحكي الموقف وانتوا احكموا بنفسكم
ركبنا الميكروباظ اللي باركبه كل اسبوع (يارب توب عليا بقي) والناس كلها ركبت والعربية حملت وماكانش فيه فاضي غير مكان واحد والراجل راح قافل الباب وقال ده محجوز
طيب ياعم محجوز لمين قال لصاحب العربية جاي دلوقتي
ماشي نستني الباشا صاحب العربية وفضلنا نستني نستني لحد ما الصبر طال علي راي ام كلثوم
بعد حوالي نص ساعة افتكرنا اننا المفروض نمشي (احنا كنا نسينا اصلا ان الميكروباظ بيمشي)
المهم الناس هاجت علي السواق يالله ياعم يالله ياعم والراجل في الاخر طلع زوق وراح ماشي
مشينا حوالي ربع ساعة والسواق جاله تليفون من صاحب العربية المزعوم يقوله انت فين (صاحب العربية اياه كان بيبعت رسالة كلمني شكرا والسواق هو اللي يتصل) السواق قاله انا طلعت من بدري وقربت علي قويسنا (انا باركب من طنطا للي مايعرفش وقويسنا دي بينها وبين طنطا حوالي 20 كيلو)
طبعا صاحب العربية راسه والف جزمة قديمة ان السواق يرجع علشان ياخده من الموقف
-- ياعم انت اللي اتأخرت والناس هاجت وماقدرتش استني اكتر من كدة وكل لما اكلمك الاقي تليفونك مقفول (ده كلام السواق)
-- ................................ كلام ماسمعناهوش بس لاحظنا رد فعله علي وش السواق (واضح انه كان من قبيل يابن تييييييييت)
وفضلنا من قويسنا لحد بنها (حوالي 20 كيلو كمان) علي هذا المنوال صاحب العربية يبعت كلمني شكرا والسواق يتصل يتهزق ويقفل ويشتم في سره والركاب يتريقوا علي السواق اللي خايف وعايز يرجع (بس علي مييييين ده كان اتقطع لو فكر يرجع)
كل ده مافيهوش مشكلة طالما اننا مش متعطلين والسواق زوق وماشي
المشكلة فين بقي
لما صاحب العربية وصل لحل جهنمي وعبقري انه هايركب عربية تانية من الموقف رايحى مصر (يااااااااه بصراحة الراجل تعب جدا في التفكير لحد ماوصل للحل العبقري ده )
بس فين المشكلة بقي اننا هانستناه في بنها لحد ما العربية اللي راكبها سيادته تعدي علينا علشان السواق الغلبان ( اللي احنا راكبين معاه) يدفع الاجرة بتاع سيادته للسواق ( اللي هو راكب معاه)
حد فاهم حاجة ؟
اقول تاني
احنا هانقف في بنها نستني الباشا اللي لسة طالع من طنطا في ميكروباظ تاني (يعني هانستني اكتر من 45 دقيقة)
ليه بقي ؟؟؟؟!!!!!!!!!
علشان الباشا والله اعلم مافيش في جيبه 7 جنيه يدفعها اجرة لميكروباظ اللي هو راكبه
وطبعا ماكانش فيه حل تاني قدام السواق الغلبان الا انه يستني الباشا والا كان هايقطع عيشه
وبائت كل محاولاتنا لثني السواق عن عزمه بالفشل
لا تهديد نفع معاه ولا وعيد ولا استرحام الناس (وخصوصا الستات ) لقلبه المسكين علشان يودينا مصالحنا
ياجماعة اللي عايز ينزل يتفضل ينزل انا لازم استناه هنا
والي هنا انتهت المشكلة وانتهي الكلام وادرك شهرزاد الصباح

ملحوظة مهمة جداااااااااااااااا

الباشا ماطلعش صاحب العربية ولا حاجة
الباشا طلع امين شرطة قد الدنيا (اوعدنا ياااااااااااااااااارب)