منتديات صحبة نت  

»   منتديات صحبة نت > المنتديات العامة > الشعر والادب العربي

 
  #1  
15-10-2014, 04:14 PM
mohamedalsoudy
محمد يونس القاضى شاعر ومؤلف مصرى مواليد 1888 فى قرية النخيله باسيوط وتوفي فى القاهره سنة 1969.
له 58 عمل مسرحى وكتير من الاغانى اللى لحنها وغناها سيد درويش وأشهر اعماله هو النشيد الوطنى المصرى "نشيد بلادى بلادى بلادى" بعض كلمات النشيد مأخوذه من خطبة مشهورة للزعيم مصطفى كامل و الرئيس السادات هو من اختاره نشيدا وطنيا لمصر سنة 1979.، وقد كتبه القاضي بعد نفى سعد زغلول .

من اجمل اشعار محمد يونس القاضي

بلادي بلادي بلادي لك حبي و فؤادى - لحن : شيخ سيد درويش

بلادى بلادى بلادى - لكِ حبى و فؤادى
مصر يا أم البلاد - انت غايتى والمراد
وعلى كل العباد - كم لنيلك من أيادى
بلادى بلادى بلادى - لك حبى وفؤادى
بلادى بلادى بلادى - لك حبى وفؤادى
مصر انت أغلى دره - فوق جبين الدهر غرة
يا بلادى عيشى حرة - واسلمى رغم الأعادى
بلادى بلادى بلادى - لك حبى وفؤادى
بلادى بلادى بلادى - لك حبى وفؤادى
مصر يا أرض النعيم - سدت بالمجد القديم
مقصدي دفع الغريم - وعلى الله إعتمادى
بلادى بلادى بلادى - لك حبى و فؤادى
بلادى بلادى بلادى - لك حبى وفؤادى
مصر أولادك كرام - أوفياء يرعوا الزمام
سوف نحظى بالمرام - بإتحادهم وإتحادى
بلادى بلادى بلادى - لك حبى و فؤادى
بلادى بلادى بلادى - لك حبى و فؤادي


زوروني كل سنة مرة - لحن وغناء: شيخ سيد درويش

زورونى كل سنة مرة
حرام تنسونى بالمرة
أنا عملت إيه فيكم
تشاكونى واشاككم
أنا اللي العمر اداديكم
حرام تنسونى بالمرة
حرام تنسونى بالمرة
يا قلبي على مالوش حد
طول عمره يقاسى الوجد
وتجرى دمعته ع الخد
مسكين حاله بالمرة
يا خوفي والهوى نظرة
تيجي وتروح بالمرة
حبيبي فرقتك مرة
حرام تنسونى بالمرة
حرام تنسونى بالمرة


اهو ده اللى صار - لحن وغناء: شيخ سيد درويش

أهو دا اللي صار و أدي اللي كان
مالكش حق
مالكش حق تلوم عليا
تلوم عليا ازاي يا سيدنا
و خير بلادنا ماهوش في ادنا
قولي عن أشيا تفدنا
و بعدها بقى لوم عليا
مصر يا أم العجايب
شعبك أصيل و الخصم عايب
خلي بالك م الحبايب
دول أنصار القضية
بدال ما يشمت فينا حاسد
إيدك في إيدي نقوم نجاهد
احنا نبقى الكل واحد
والأيادي تكون قويه


انا هويته وانتهيت - لحن وغناء: شيخ سيد درويش

أنا هويته وانتهيت
وليه بقى لوم العذول
يحب إني أقول ياريت
الحب ده عني يزول
ما دمت أنا بهجره ارتضيت
خلي بقى إللي يقول يقول
أنا وحبيبي في الغرام
مافيش كده ولا في المنام
أحبه حتى في الخصام
وبعده عني يا ناس حرام
ما دمت أنا بهجره ارتضيت
مني على الدنيا السلام


يابلح زغلول - غناء: نعيمه المصريه
للمطالبة بعودة سعد زغلول من المنفى

يا بلح زغلول يا حليوة يا بلح
يا بلح زغلول يا زرع بلدي
عليك ياوعدي يابخت سعدي
زغلول يا بلح يا بلح زغلول
يا حليوة يا بلح يا بلح زغلول
عليك أنادى في كل وادى
قصدي ومرادي
زغلول يا بلح يا بلح زغلول
يا حليوة يا بلح يا بلح زغلول
الله اكبر عليك يا سكر
يا جابر اجبر
زغلول يا بلح يا بلح زغلول
يا حليوة يا بلح يا بلح زغلول
ماعيتشي أبكي وفيه مدبر مين بس ينكر زغلول يابلح
ياروح بلادك ليه طال بعادك
تعا صون بلادك
زغلول يا بلح يا بلح زغلول
يا حليوة يا بلح يا بلح زغلول
سعد وقال لي ربي نصرني
وراجع لوطني
زغلول يا بلح يا بلح زغلول
يا حليوة يا بلح يا بلح زغلول


خفيف الروح بيتعاجب - غناء: ابراهيم زكى موردخاى

خفيف الروح بيتعاجب
بيتعاجب
برمش العين والحاجب
خفيف الروح
غمز لى مرة بعيونه
لقيت الحب مضمونه
حرام ان كنت انا اخونه
وعشقى له من الواجب
خفيف الروح
تملى يحب يشغلنى
بسهم اللحظ والننى
أخاف اتقل يخاصمنى
ويهجرنى ويحرمنى
خفيف الروح
رأيت الأوفق ان جانى
حبيب القلب نادانى
أرد عليه بأجفانى
ولا أحسب حساب عازل
خفيفالروح


ما يجيش زى إن لف الكون - غناء: منيره المهديه

ميجيش زى إن لف الكون
أسأل التاريخ ينبيك
إنت تغر الناس حتاويك
ظهرت غرايب فى الآثار
ووصفى كم حير أفكار
وعمر قلبى إن كان يرتاح
واعمل سياسة السلم سلاح
بإيه تزيد إنت علىّ
ومصر أم المدنية
دنا أبويا توت عنخ آمون
عن مجدنا وبعدين أمشيك
وأنا أبويا توت عنخ آمون
تخلى جميع الناس تحتار
وأنا أبويا توت عنخ آمون
إلا إن رجع مجدى اللى راح
وأنا أبويا توت عنخ آمون
وبلادى مهد الحرية
وأنا أبويا توت عنخ آمون


ارخى الستاره اللى فريحنا - غناء: منيره المهديه

ارخى الستارة اللى فريحنا
لاحسن جيرانك تجرحنا
يا فرحانين يا مبسوطين
يا مفرفشين يا مزأططين قوي احنا
دلوقت بس أنا اللي ارتحت
لا حد فوق ولا حد تحت
يعرفني جيت ولا روحت
ولا حد يقدر يلمحنا
قلبي بيطب قوي وخايفة
عندك شباك نواحي العطفة
افتح درفة واقفل درفة
وقوم نغير مطرحنا


ابوها راضى وانا راضى - غناء: صالح عبد الحى

بوها راضي وانا راضي
ومالك انت بقى ومالنا يا قاضي
البنت سن تلاتاشر
والوش قمر اربعتاشر
والجسم ماشاء الله راخر
ما يفوتشي من بيت القاضي
يا ست ابوكي برموكي
وفي الشوارع هبلوكي
وبالمناظر بهلوكي
والوالي عارف والقاضي
البنت بتشوف الزفة
تفرح وهي في اللفة
وتقول عريس اختي خفة
وتشيب على مجي القاضي
اكتب كتابها وطاوعني
واوعى يا قاضي تلاوعني
ولا انت عايز بقى يعني
دايما نشاكي ونقاضي


تعالى يا شاطر نروح القناطر - غناء: نعيمه المصريه

تعالى يا شاطر نروح القناطر
هاودني ودينك ما تكسر لي خاطر
هات القزازة واقعد لاعبني
دي المزة طازة والحال عاجبني
هنيني بخفتك واسقيني بذمتك
في قربك يا غالي أغني الليالي
كمل صفايا وانت مآنسني
حلفت عدايا إلا تعاكسني
إن لاموا وطولوا خليهم يفلفلوا
في يوم التصافي ما يسعد خلافي
يا روحي يا ست نعيمة
رضاك عليا ما دام أنوله
يتم ليا وصلك واطوله
أنا ديني وملتي إخلاصي ومحبتي
ده حبك عبادة وقربك سعادة


ياعزيز عينى - غناء: سيد درويش

يا عزيز عينى بلدى يا بلدى
أنا بدى أروح بلدى والسلطة خدت ولدى
يا عزيز عينى يا حكيمباشى
أنا بدى أروح بلدى تعالى اكشف على ولدى
جبت الطبيب والحكيم قاللى الطبيب والحكيم
يكشفوا على قلبى مالكش دوا عندى
عشر قزايز ورد ورا عين م القطيفة
للمحبوب بتسلينى م الجمال* بتكفينى
محلوك صغير من بعد عمر طويل
يشيل الكاس ويدينى ييجى حبى يقابلنى
ما تحسبوش يابنات أول أسبوع يا بنات
إن الجواز ده راحه ع الفرش مرتاحة
تانى إسبوع يا بنات تالت اسبوع يا بنات
خوخة وتفاحة حماتى رواحة
رابع أسبوع يا بنات خامس اسبوع يا بنات
فى البيت نواحة ع القاضى سواحة
سادس أسبوع يا بنات مفيش لزوم با بنات
على بيت أبويا رايحة تتجوزوا بالمرة
إن كان جوازكم يا بنات وتبقوا عايشين يا بنات
حيكون كده عره فى العيشة دى المرة
ويكون آخرتها يا بنات ويمكن تختم يا بنات
تنطردوا وتخرجوا بره بمضايقة الضرة


يمامه حلوه - غناء: منيره المهديه

مامه حلوة ومنين أجيبها
طارت يانينه عند صاحبها
تطير وتجيني قاصدة تسليني
لأحلف بديني لأطير وياها
وخطفها البلبل وطار وياها
أصله يانينا يعرف لغاها
شعرها يهفهف وعليها يرفرف
وانا بدي أعرف مطرح ماهيا
شعرها أصفر حلو ومضفر
ماشيه تتمخطر قلبي عشقها
طارت في قصري إمبارح العصري
وصاحبها المصري طالع يجبها
جم يخطبوها مني ويخدوها
ويسجلوها في الحقانية
البلبل خدها وطار وياها
أصله يانينة ياعرف لغاها
يمامة حلوة ومنين أجيبها
طارت يانينه وقلبي هواها
  #2  
06-02-2015, 08:42 PM
waiak_52
بسم الله الرحمن الرحيم

أختيار فى غايه
الجمال والروعه
أختياراتك دائما
مميزه ورائعه

سلمت يداك
أخى الغالى

بارك الله فيك
حفظك الرحمن
من كل سوء

تقبل تحيتى
أسعد الله أيامك
فى أمان الله
 





Powered by vBulletin
Copyright ©2000 - 2017, Jelsoft Enterprises Ltd

سياسة الخصوصية